ПРЕД ПРЕМИЕРАТА НА ДРАМАТА НА САШО ТАСЕВСКИ


Сашо Тасевски и Рубенс Муратовски играат другари од детството Џици и Мртва, кои го преживуваат вториот библиски потоп. И по 10 години изолирани од цивилизацијата, сфаќаат дека сите оние вредности кои ги сметале за релевантни пред потопот, повеќе немаат никакво значење за нив

Во Драмски театар пред крај се подготовките за премиерата на "Интермецо", според драмата на актерот Сашо Тасевски од книгата "Шмизла", а ја режира негов колега, исто актер, Роберт Вељановски. Играат авторот Тасевски и Рубенс Муратовски, музиката ја подготвува Горан Трајковски, а сценографијата и костимите се на Тихомир Спировски.
"Темата е провокативна, говори за отуѓеноста на луѓето во светот во кој живееме. Се говори за двајца луѓе, за отуѓеноста, за глобалното навлегување на Интернетот. Ако не постоиш на Интернет, не постоиш во буквална смисла на зборот. Парадоксално, но пред некоја вечер во 19 часот отворивме група на Фејсбук. За 16 часа имавме повеќе од 800 поддржувачи. Прашањето е колку време ќе ни треба 800 души да ги собереме на едно место", објаснува Вељановски.
Претставата, вели тој, во буквална смисла, чини нула денари. Помошта која ја добиваат од Драмски е единствено во реквизитите од претстави кои се симнати од репертоар. Ќе игра на репертоар, публиката ќе биде ограничена на 100 до 120 души, поради сценографијата која е составена од боксерски ринг.
Рубенс вели дека му е драго што Сашо пишува текстови, кога веќе драматурзите не пишуваат во оваа држава.
Премиерата е на 20 јануари, што се поклопува со реизданието на "Шмизла" кое ќе се продава на манифестацијата "Книга во секој дом" во книжарницата на "Матица македонска" .
Б.Нестороска
фото: И.Илиев

          Извор „Вест„ 15.01.2010

ВО МНТ

Класиката на Вајлд, во изведба на ХНК, според хрватските медиуми на јуриш ја освои и публиката и критиката

Во Македонскиот народен театар, според договорот за соработка со Хрватско народно казалиште од Загреб, на крајот на месецов ќе гостува уште една хит-претстава на оваа реномирана театарска куќа. Се работи за класиката на големиот ирски писател Оскар Вајлд "Важно е да се викаш Ернест", а во режија на Томислав Павковиќ.
"Тривијална комедија за сериозни луѓе" е поднасловот на претставата, која ја имаше нејзината премиера во 2007 во Загреб и која, според хрватските медиуми, "на јуриш ја освои и публиката и критиката". Претставата кај нас го носи оригиналниот актерски состав од премиерната изведба, со првенците на ХНК Горан Гргиќ, Душан Бучан, Бранка Цветковиќ и Лука Драгиќ.
Текстот на Вајлд е неговата најпозната и најдобра комедија, првпат изведена во во 1895. Драмскиот текст "Важно е да се викаш Ернес" е еден од најпоставуваните текстови во театрите низ светот, и врв во кариерата на Оскар Вајлд.

МНТ во копродукција со берлинска опера

МНТ најави две премиери кои ќе се реализираат до април годинава. Првата е "Суд", по текст на Коле Чашуле, во режија на Љупчо Ѓоргиевски. Во претставата ќе биде вклучен младиот ансамбл на Театарот, во тек се пробите, а премиерата се очекува на почетокот на февруари.
Втората претстава е со работен наслов "10 песни за Марија", по текст на Дејан Дуковски, и е соработка помеѓу МНТ и "Келн", оперска куќа од Берлин што, според директорот Сашо Миленковски, е продолжување на истражувањето на различните театарски изрази кои веќе неколку години се приоритетни во МНТ, во конкретниот пример - музиката во театарот. Претставата почнува со подготовки на 22. овој месец, а премиерата ќе ја има на 8 април во Берлин. Македонски актери што ќе бидат дел од претставата се Сенко Велинов, Горазд Цветковски и Јелена Јованова.

          Извор „Вест„ 15.01.2010

И покрај финансиските проблеми продолжуваат да работат со полна пареа. Твореле од љубов со надеж дека набрзо ваквата ситуација ќе биде минато вели првиот човек на МНТ, Миленковски. Тој најави неколку нови проекти.

УШТЕ ЕДНО ГОСТУВАЊЕ ОД ХРВАТСКА

ХНК од Загреб со претставата "Важно е да се викаш Ернест", по текст на Оскар Вајлд, а во режија на Томислав Павковиќ, во рамките на билатералната театарска спогодба помеѓу МНТ и Хрватската национална театарска куќа ќе гостува на крајот од месецот (29 и 30 јануари) на сцената на театар Центар. Ќе настапат познати актери кои на поширокиот македонски аудиториум му се познати претежно од хрватските теленовели. Тоа, воедно беше повод за вчерашната прес-конференција, што директорот Сашо Миленковски ја искористи и за да ги каже идните планови на МНТ.