Магија на костими со светло проследена со многу песни и музика е новата детска претстава „Малата сирена“, според бајката на Ханс Кристијан Андерсен, која премиерно ќе биде изведена утревечер во 19 часот, во Театарот за деца и младинци во Скопје.

Претставата за малата сирена од Русомир Богдановски е во режија на Деан Дамјановски, сценографијата е на Љубомир Чадиковски, костимите на Александар Ношпал, музиката на Љупчо Мирковски и кореографијата на Сања Шутевска.

Според директорот на Театарот за деца и младинци, Љубомир Чадиковски, оваа претстава е визуелна бајка со која е достигнат врвот во изработка на костимите.

- Бајката делува волшебно. Сценографијата, костимографијата, актерската екипа, режисерската работа и музиката функционираат беспрекорно, што придонесува за одлична претстава. Два елемента се пресудни за овој театар - добри костими и музика, а романтичната бајка кај децата предизвикува посебни чувства. Отсекогаш сме биле познати по костимите, но овој пат тие се врвот и беа работени три месеци - вели Чадиковски.

Претставата трае 54 минути, а во неа учествува целата ектерска екипа на театарот и тројца гости. Од гостите, во улогата на Принцот се појавува Ефтим Трајчов, Морската самовила и Златната кралица ги игра Зорица Стојановска, а Октоподот Кутричок е Марија Ѓорѓиовска. Малата сирена е Винета Дамческа, Морскиот лав Андерсен е Владимир Лазовски, Кралот на морето е Предраг Павловски, Златниот крал го игра Драган Довлев, улогите на Морската вештерка и Сребрената принцеза ги толкува Катарина Илиевска, а Големата сирена е Ана Левајковиќ.

За режисерот Дамјановски ова е прва детска претстава и тој вели дека одговорноста во детски проекти е поголема.

- Направивме еден поинаков крај на сценариото и „Малата сирена“ жанровски може да се смести на работ на детски мјузикл. Дозата на одговорност е многу голема кога се работи театар за деца и тежината на една детска претстава е огромна. Уживав во работата бидејќи се судрив со огромна професионалност и детската публика е за мене мотив повеќе - рече Дамјановски.

Претставата е дел од програмата за минатата година и веќе имаше претпремиера во декември. (М.Л.)

          Извор „Дневник„ 15.01.2010

Инаку, претставата изобилува со музика, песни кои дополнително придонесуваат за нејзината бајковитост. "По својот жанр нашата претстава е речиси на работ на детски мјузикл кој завршува со среќен крај", рече на вчерашниот прес режисерот Дамјановски. Тој не ги штедеше пофалните зборови за "високата доза на професионализам што владее во Театарот за деца и младинци, во сите сегменти".
Неспорно тука се и актерите: Винета Дамчевска, студентот на ФДУ Ефтим Трајчов (како гостин), Владимир Лазовски, Предраг Павловски, Драган Довлев, Зорица Стојановска (к.г.), Катарина Илиевска, Марија Ѓорѓиовска (к.г.) и Ана Левајковиќ.

          Извор „Вечер„ 15.01.2010

„Малата сирена“ во театарот за деца Претставата „Малата сирена“ од Ханс Кристијан Андерсен, во драматизација на Русомир Богдановски и во режија на Деан Дамјановски, премиерно ќе биде изведена утревечер во Театарот за деца и младинци во Скопје, од 19 часот. Станува збор за познатата бајка од Андерсен за сирената која се заљубува во млад и убав принц и посакува да стане човек. Наместо трагичниот крај на приказната, во кој принцот ја напушта сирената женејќи се со друга девојка, постановката во Театарот за деца и младинци носи среќен завршеток. Директорот на куќата Љубомир Чадиковски вели дека костимите за претставата, по чијашто вешта изработка е познат овој театар, овојпат го достигнуваат врвот во умешноста. Костимографијата е правена цели три месеци, по дизајн на Александар Ношпал, а во изведба на Љубица Велкова. - Со светлото, костимите, режијата, изведбата и сценографијата, претставата е волшебна. Станува збор за романтична бајка која кај децата предизвикува посебни емоции. Тие денес се информирани за се, а кога ќе дојдат во театар, треба да ја почувствуваат магијата - вели Чадиковски. За режисерот Дамјановски оваа претстава е на работ да се нарече детски мјузикл бидејќи во неа музичкиот дел е застапен со голем процент. - За разлика од публиката од другите театри, која има старосна возраст над 15 години, овде публиката е точно дефинирана. Точно се знае кој ќе ја гледа претставата и конкретно се исполнува таа задача. За мене тоа е мотив плус. Дозата одговорност, пак, кога се прави проект за деца е многу висока, но јас уживав во работата - вели Дамјановски. Во „Малата сирена“ играат актерите: Винета Дамческа, Ефтим Трајчов, Владимир Лазовски, Предраг Павловски, Драган Довлев, Зорица Стојановска, Катарина Илиевска, Марија Ѓорѓијовска и Ана Левајковиќ. Сценографијата е на Љубомир Чадиковски, музиката на Љупчо Мирковски, а кореографијата на Сања Шутевска.

          Извор „Време„ 15.01.2010